بؤلوم : شعر
پنجشنبه 11 اردیبهشت 1393     یازار :  kölgə siz
+0


آغ آیم

آغ آتیم ، قول قاناتیم 

آت قدمین یورتما یئری(۱)! 

آش تپه لردن 

سیلدیریم تک سره لر دن 

سئله سینمیش دره لردن 

بو نه طوفاندی گوزل گهلیگیمی ایستیر آییرسین فره لردن(۲) 

غیرتیم جوشه گلیر غملی خبر دن 

آغ آتیم قورخما خطر دن! 

آغ آتیم ، قول قاناتیم 

شیهه چک ، قوی سسیوه 

بلکه یاتالار دا اویانسین 

یاتماغین واختی دگیل دورسون اوتانسین 

یاتانین عومرو تالانسین 

تازا نعلین وار آتیم 

چال بو داغین سینه سینه ، قوی پارالانسین 

چال داغین سینه سی باتسین ، یارالانسین 

داشی داشدان ، آرالانسین. 

آغ آتیم ، قول قاناتیم 

داش قایادان آشما چتیندی 

قاباق اوز یوققوشادی ، قاشما چتیندی 

داغا دیرماشما چتیندی 

داشا ، سوخاشما(۳) چتیندی 

باخما یولاری چتین ، هیبتی چوخدور 

آغ آتیم آت قدمین ! 

غیرتی یوخدور 

هله اوز یوققوشلارا چوخدو قاباقدا 

آشماق اولماز بو آیاقدا 

آغ آتیم ، قول قاناتیم 

بسدی ایاق ساخلاما ، گون باتدی قارالدی 

گون گچیب داغ دالینا رنگی سارالدی 

داغین اوستون دومان آلدی 

آغ آتیم بس بو نه حالدی؟ 

بورا یارقاندی (۴) آتیم دوما آماندی .... 

دورماغین قیمتی جاندی 

آغ آتیم ، قول قاناتیم 

آت قدمین آیدینلیغا ساری 

هورکوشن(۵)اوولاریلان (۶)؛ چیخ سره یاللاری (۷)یوخاری 

قار قالان داغلارا سال بیر نفسین 

قوی اریسین بوز کیمی چئگنینده کی قاری 

قوریان گوللره سالدیر بو سولاری 

سال بو ارخ ایچره سووارسین قورو قالمیش مومالاری 

قوی بویوک گولده اوزوشسونله یاشیل باش سونالاری 

آغ آتیم جهد ائله باری 

سنی تاری! 

آغ آتیم ، قول قاناتیم 

طبعیمین دریاسی جوشقوندو 

یئل اسدیر لپه لنسین 

قوی چالیم صخره لره دالغامی(۸) ، داغام سپه لنسین 

قوی یاغیش تک قوریان 

داغلارین اوستونده اله نسین 

هرزه اوتلاری آپارسین 

لالا بیتسن 

هامی گوللر تزه لنسین 

گولو بولبول یییه لنسین 

آغ آتیم ، قول قاناتیم 

شیهه چک قوی سسیوه 

هاجرینی ترکینه چکسین نبی گلسین 

قوی کوراغلو قیر آتین داغلارا سالسین 

ائشیدیب شیهه نی گلسین 

الده کسگین قیلیجیلا 

بویاسین قانه کئچل حمزه نی گلسین 

قوی کرم سازینی سالسسین دوشنه چوللره دوشسون 

های سسی اوللره دوشسون 

دئگیلن غملی کرم ایستیر اگر ، اصلینی گلیسین 

آغ آتیم ، قول قاناتیم 

بیز اگر قلعه ی سیمرغ دان آشساق بیزه آزدی 

باخما یولار ناتارازدی 

باخما بو قارلی دماوند ، بو قفقاز بو هرازدی 

باخما داغدا هاوا دوتقوندو ـ آیازدی (۹) 

باخما بو قیشدی بو یازدی 

آغ آتیم آت قدمین دریا ، دایازدی (۱۰) 

دریانی گیچسن اگر شهرِ نیازدی 

اوردا هر قان کی توکولدو یئره ، آزادلیغی یازدی 

بشر ازادلیغا بازدی! 

آغ آتیم ، قول قاناتیم 

اوردا دولبرچین اوتو دورت پر آچیبدی 

اوردا دیللنمگه دیل تازه شیرین دیللر آچیبدی 

اوردا باغلاردا بوتون گوللر آچیبدی 

آغ آتیم 

آت قدم 

آیدینلیغا ساری! 

آغ آتیم 

آت قدم 

آیدینلیغا ساری! 



۱. یورتما یئریمک ؛ آت یئریشی. 

۲. فره ؛ کهلیک بالاسی 

۳. سوخاشما ؛ دیرماشماق 

۴. یارقان ، یارغان ، اوچوروم 

۵. هورکوشن ، اورکوشن ، قورخوب قاچان . 

۶. اوو ؛ آو ، وصید ، شکار ( عوام تصورنده &lt;<آو>> فارسجا <<آهو>> نون مخفف تلفظو دور و بو نه یالنیش دیر ) 

۷. سره یال : سره ، گدیک 

۸. دالغا ، شپه ، موج ، لپه 

۹. آیاز ؛ آیلیق و سویوق گئجه . 

۱۰. دایاز ؛ کم عمق ، درین یوخ! ( دوزون سوزی <<دایاز>> اوچون فارسجادا دوزگون معادل تاپا بیلمه دیم )


آچار سؤزلر : هوشنگ جعفری, آغ آتیم, شعر, تورکی,